Skjøl frá Pfizer máa støðið undan útsagnunum sum “tryggar og munadyggar”

Skjøl, ið snúgva seg um upplýst samtykki, sum Pfizer og eitt sjúkrahús hava latið gera, sum felagskapurin ICAN (Informed Consent Action Network) hevur fingið hendur á, vísa, at medisinframleiðarin sjálvur upplýsir møguligar heilsutrupulleikar, ið kunnu standast av koppsetingini, so sum hjartabruni (myocarditis), original antigenic sin (kenni tíverri ikki føroyska heitið) og fosturbrek, meðan stovnarnir, sum skulu hava eftirlit við heiligvágnum, skýra vørurnar at vera tryggar og munadyggar.

ICAN hevur fingið hendur á tilfarinum, sum Cincinatti Childrens Hospital brúkti í sambandi við upplýst samtykki í sínum kanningum av koppsetingunum hjá Pfizer, m.a. millum børn. Skjølini, sum eru framleidd í samstarvi millum sjúkrahúsið og Pfizer, siga okkum eina rúgvu um, hvussu Pfizer skilir váðarnar við sínum egnu koppingarevnum.

Pfizer stúrir m.a. fyri at har kann vera vandi fyri hjartabruna millum børn. Teirra egnu upplýst-samtykki skjøl avdúka, at váðin fyri at fáa hjartabruna kann vera so høgur sum 1 av hvørjum 1000 (sí síðu 4).

Men FDA og CDC lótu ikki við seg koma, tá ið mRNA-prikini vórðu góðkend til børn, (fyrst í USA, síðani í Europa, so DK og síðani Føroyum).

Ikki fyrrenn aftaná at koppingarevnini vóru skundað ígjøgnum góðkenningarmannagongdirnar noyddist CDC at viðganga, at “hjartabruni (myocarditis og pericarditis) koma fyri í sjáldsomum førum, serliga millum hálvvaksnar dreingir og ungar menn, innan nakrar dagar eftir kovid koppseting.”

Medisinframleiðarin er eisini varugur við møguleikan fyri sonevndari ‘original antigenic sin’ og ‘pathogenic priming’, sum eru óynsktar reaktiónir frá immunverjuni, og sum seta teg í eina veikari og verri støðu, tá immunverjan skal verja móti einum virus, enn um tú einki hevði gjørt áðrenn. Pfizer ávarar foreldur hjá børnum, sum taka lut í kanningunum, at “tað kann ikki útilokast, at koppsetingin kann elva til, at børnini gerast verri sjúk, um tey verða smittað av kovid19 seinni.”

Tað sær eisini út til at Pfizer stúrir nógv fyri teratogenesis, sum er skaði á fostur í menning, og enntá møguliga mutagenesis, sum er skaði á DNA. Hóast hetta er ein kanning millum børn, so avdúkar Pfizer fyri foreldrunum at hesum børnum, at “virknaðurin koppsetingin kann hava á sáð, viðgongutíð, fostur, ella eitt bróstabarn, er ikki kendur.”

Men so fer Pfizer enn víðari og boðar frá at (síða 10 og 11):

• “um dóttir tín er við barn, ætlar at gerast við barn, ella hevur eitt bróstabarn, so kann hon ikki vera við í kanningini, eftirsum at tað kunnu vera vandar fyri ófødda barnið ella bróstabarnið. Eingin veit hvørjir hesir vandar eru beint nú

• “Um dóttir tín verður upp á vegin, so noyðist hon at fara úr kanningini.”

• “Um barn títt er ein drongur, og hann heldur, hann kann hava gjørt eina gentu upp á vegin, so mugu tú ella hann siga kanningarlæknanum frá í stundini. Kanningarlæknin fer møguliga at spyrja um upplýsingar í sambandi við viðgongutíðina og føðingina av barninum. Kanningarlæknin kann deila hesar upplýsingar við onnur, sum arbeiða við hesari kanningini.”
  

• “Um sonur tín er partur av hesari kanning, so er honum ikki loyvt at lata sáð (sum donorur) í minst 28 dagar eftir hansara seinastu koppseting.”

Við øðrum orðum sær út til, at Pfizer garderar seg væl, tí tey høvdu einki data um hvussu koppingin ávirkar viðgongutíðina og fostrið.

Havandi alt hetta í huga, eru viðmælini hjá CDC (og føroysku heilsumyndugleikunum og flestu heilsumyndugleikum kring heimin) til kvinnur við barn, at lata seg koppseta, vísindaliga ivasom, fyri at siga tað milt.

Samanber hesar útsagnirnar:

“Samlaða vitanin gevur okkum prógv fyri at koppseting av barnakonum móti kovid19 er bæði trygg og munadygg.” - CDC

“Tað er ikki nóg nógv tøkt próvtilfar viðv. koppseting av kvinnum við barn við COMIRNATY til at meta um møguligan váða av koppseting í viðgongutíðini.” - BioNtech/Pfizer

FDA, CDC (og sunhedsstyrelsen, serumstovnurin og føroysku heilsumyndugleikarnir o.o.) hava sum uppgávu at meta sakliga og gjølla um próvtilfarið í samband við nýggjan heiligvág til tess at at tryggja, at tað er trygt hjá okkum borgarunum at nýta heiligvágin. Tíverri kundi tað stundum sæð út til, at hesir stovnar kenna tað meira sum sína uppgávu, at virka sølufremjandi fyri hesar vørur.

Vit skrivaðu herfyri eisini um eitt annað mál, sum viðvíkir nýliga leysgivnum Pfizer-skjølum. Hesi skjølini, eini 400.000 í tali, eru próvtilfarið/dáturnar frá klinisku kanningunum hjá Pfizer, sum vóru latin FDA í sambandi við tilgongdina um góðkenning av koppsetingini. Ein bólkur av læknum bað um at sleppa at síggja skjølini, men fingu at vita, at tey skuldu leysgevast í smáum ígjøgnum 75 ár. Læknarnir fóru víðari til ein dómara við eini sokallaðari FOIA request, tað sum svarar til bøn um alment innlit hjá okkum. Dómarin eftirlíkaði, og nú skulu øll 400.000 skjølini verða almenn í ár. Fyrstu síðurnar komu fyri jól, og síðani komu næstu uml 10.000 síðurnar tíðliga í mars mánaða. Vit fara at fylgja málinum.

Kelda: ICAN legal update 22.03.2022