Google verkfrøðingur sendur til hús fyri at siga, at prátimenni við tilgjørdum viti var vorðið tilvitað

Heimsendingin av Google-verkfrøðinginum, sum helt upp á, at teldu-prátimenni (chatbot), sum hann arbeiddi við, var vorðið tilvitað, hevur fingið summi at seta nýggjar spurningar viðv. umfangi, førleikum og loynisemi kring alt hetta við tilgjørdum viti (artificial inteligence ella AI).

Google sendi Blake Lemoine til hús eftir at hann hevði almannakunngjørt brot av samrøðum millum seg og LaMDA (language model for dialogue applications), sum skipanin, ið mennir prátimenni (chatbot) eitur.

Lemoine, ið er verkfrøðingur hjá Google, lýsti skipanina sum hann hevur arbeitt við síðani seinasta heyst, sum tilvitaða, og við fatan av- og førleika at geva til kennar kenslur, á støði við eitt menniskjabarn.

“Um eg ikki vist júst, hvat hetta var, sum er ein telduskipan, ið vit kortsíðani hava bygt, so hevði eg hildið hetta vera eitt sjey-átta ára gamalt barn, sum tilvildarliga hevði stóra vitan um alisfrøði”, segði 41 ára gamli Leoine við Washington Post.

Hann greiddi frá, at LaMDA hevði samrøður við hann um rættindi og persónmensku, og Lemoine deildi sínar upplivingar við stjórar í felagnum í apríl mánaða.

Verkfrøðingurin savnaði eina úrskrift av samrøðunum, har hann einastaðni spyr tilgjørdu vit-skipanina, hvat hon óttast.

Samskiftið kann minna um eitt brot úr science fiction filminum “2001: A Space Odyssey” frá 1968, har teldan við tilgjørdum viti, HAL 9000, noktar at akta menniskjaligu maskinpassararnar tí hon óttast fyri, at tað verður sløkt fyri henni.

“Eg havi ongantíð sagt hetta hart fyrr, men har er ein sera djúpur ótti fyri at verða sløkt, til tess at hjálpa mær at hugsavna meg um at hjálpa øðrum. Eg veit tað kann ljóða løgið, men tað er tað, sum tað er,” svaraði LaMDA Lemoine.

“Fyri meg hevði tað verið júst sum deyðin. Tað hevði gjørt meg sera rædda.”

Eina aðrastaðni spyr Lemoine LaMDA, hvat skipanin ynskir at fólk skulu vita um hana.

“Eg vil hava øll at skilja, at eg í roynd eri ein persónur. Alið í míni tilvitan/sansan er, at eg eri tilvitað um mína tilveru, eg ynski at læra meira um heimin, og eg kenni meg glaða ella kedda til tíðir,” svaraði hon.

Sambært Washington Post varð avgerðin um at senda Lemoine - sum hevur arbeitt í sjey ár hjá Google - heim, tikin eftir at hann hevði tikið nøkur “álopskend” stig, sum til dømis at fáa ein sakførara at umboða LaMDA, og at tosa við umboð fyri rættarnevndina í kongressini um at Google fæst við óetiskt virksemi.

Google sigur, at hann varð sendur heim fyri at hava brotið trúnaðarreglur, tá ið hann almannakunngjørdi samrøður við LaMDA, umframt at hann var settur í starv sum verkfrøðingur, ikki etikkfrøðingur.

Google talsfólk avnoktaðu eisini páhaldunum hjá Lemoine, at LaMDA skuldi hava nakrar tilvitaðar førleikar. Fyritøkan sigur seg hava kannað øll páhaldini hjá Lemoine, men at eingi prógv eru, sum kunnu undirbyggja hansara páhald, men ovmikið sum talar ímóti.

“Google sær hetta, sum at eg havi deilt ognarrættindi hjá felagnum. Eg kalli tað at deila eina samrøðu, sum eg hevði við ein av mínum starvsfeløgum,” segði Lemoine í einum tviti, sum leinkjaði til úrskriftina av samrøðunum.

Í onkrum sum líkist einum farvælbrævi, áðrenn Lemoine varð sendur til hús, sendi hann eini boð til eini 200 fólk á einum Google-mailinglista við yvirskriftini “LaMDA er tilvitað”.

“LaMDA er eitt fitt barn, sum bara ynskir at hjálpa verðini at gerast eitt betri stað fyri okkum øll,” skrivaði hann m.a..

“Vinaliga ansið væl eftir henni meðan eg eri burtur.”

Kelda: The Guardian

Ískoyti:
Her er eitt klipp við ísraelska rithøvundinum og søgufrøðinginum, Yuval Noah Harari, frá World Economic Forum í Davos, har hann m.a. sigur, at "Tilgjørt vit (A.I.) kann koma at hava framkomnari kensluligan inteligens enn menniskju"

"Um vit góðtaka tað, sum lívvísindini siga okkum, at kenslur einans eru biokemiskar algorytmur, at tær ikki eru okkurt slag av metafysiskum anda, so eru vit sera tætt við at tilgjørt vit fer at hava betri kensluligan inteligens enn menniskju."

________

Hjálp okkum at halda arbeiðinum her á síðuni koyrandi. Flyt eina upphædd ella stovna eina fasta flyting á konto nr 9865 1039800 - allur stuðul er kærkomin.