Finnland keypir framvegis gass úr Russlandi

Finska gassfelagið, Gasum, hevur hildið á at keypa gass úr Russlandi, eisini eftir russisku innrásina í Ukraina.

Sambært tølum frá finska tollvaldinum, sum Yle hevur fingið hendur á, hevur Gasum keypt fyri 175 milliónir eurur síðani februar í 2022, hetta svarar til 1,3 milliard í donskum krónum.

Gasum váttar fyri Yle, at felagið hevur skrivað undir ein langtíðarsáttmála við russiska felagið Gazprom um veiting av gassi, sum er galdandi í fleiri ár fram og at hesin sáttmáli var undirskrivaður áðrenn 2022.

Gasum vísti á, at felagið hevur einki løgligt grundarlag at siga sáttmálan upp.

Í august í 2022 segði finski ráðharrin fyri Europamál, at keyp av russiskum gassi skuldi steðga.

ES hevur ikki bannað sølu av russiskum gassi, hóast summi av limalondunum hava tikið stig fyri at flyta seg frá russiskum orkuveitingum.

“Síðani byrjanina av krígnum hevur Gasum einans innflut minst møguligu mongdina av gassi úr Russlandi, so sum sáttmálin fyriskrivar. Vit hava ikki biðið um meira og ætla heldur ikki at gera tað í framtíðini”, sigur felagið við Yle.

Kelda: Yle - Finland still purchasing gas from Russia